（2024.03.16寫佇個人面冊）
「虛進」，tsit个詞，我想著應該有兩年以上，mā佇面冊用過幾擺矣，毋過毋捌特別解說過。台華通用，用來代替進前我會稱做激進、假進步、掛引號帶剾洗ê「進步」、左膠等等詞。當然是tsia-ê詞lóng無夠好用抑無夠清楚，才愛來創新詞。
虛進，簡單會使giú長解做「虛無ê進步」。毋過既然是虛無ê、空虛ê，當然he就毋是咱正經承認ê進步。虛進ê人事物，就是佇tsit个時代有占著進步ê形象，毋過無實際抑積極ê價值觀。
為抽象概念寫出短短ê定義是足困難ê代誌。我先閃tsit个工課，想著啥先講啥：虛進，佇咱tsit个時代社會，大部份（毋過無限定）關係身份政治。就是先做人口分類，認定各分類之間lóng是壓迫佮鬥爭ê關係；照分類定是非，也就是無實際ê是非，認定是弱勢ê抑少數ê，以in ê名義講ê（無一定是in家己講抑是符合in ê利益）就是著ê。毋過是啥物人講準算？就是已經占著進步形象ê箍仔。
虛進ê概念mā佮我早就提出ê尚弱真重疊，毋過應該koh較闊。虛進尚弱ê文化，會生產愈來愈tsē無路用無責任ê老嬰，予社會ê功能衰bái去。老嬰來世間是受人服務，毋是共人服務ê。In kan-na欲「【中】做自己」。當然in實際上袂做家己。In會順從真正ê霸權，比論華化政策抑享樂消費主義。是你勸in愛學台語抑莫食hiah濟ê時，你會變做壓迫者、歧視者。Tsit款社會是無法度追求任何要求平民出力ê目標抑價值。
我會慢慢仔koh共對虛進尚弱ê批判寫koh較完整。下跤先加減貼幾篇相關舊文。
